كتير من الناس لما حد يسألهم سؤال بالإنجليزي دماغهم بتبدأ تترجم السؤال بالعربي الأول ويفكروا في الإجابة بالعربي، وبعد كده يحاولوا يترجموها للإنجليزي كلمة بكلمة، وللأسف بيلاقوا إن النتيجة إنهم بيتكلموا ببطء وبتردد.
لو إنت من الناس دي، فإنت مش لوحدك، وده مش معناه إنجليزيك ضعيف، ده معناه إنك اتعلمت الإنجليزي بطريقة معينة خلت دماغك بترجم بالعربي الأول قبل ما يوصل للإنجليزي، وفي المقال ده هنعرفك ليه بتفكر بالعربي قبل ما تتكلم إنجليزي؟ وإزاي تتخلص من المشكلة دي.
ليه بتفكر بالعربي قبل ما تتكلم إنجليزي؟
في أسباب كتير بتخليك تفكر بالعربي قبل ما تتكلم إنجليزي، وغالباً الأسباب دي بتكون مرتبطة بطريقة تعلمك للغة من البداية مش بقدرتك على التعلم زي:
1- دماغك اتدرب سنين طويلة على العربي
فطبيعي جداً يعتمد عليه كمرجع أساسي لما يحاول يتعلم لغة جديدة، والأبحاث اللغوية أكدت إن المتعلمين العرب غالباً ما بيتعاملوش مع الإنجليزي كأنه نظام منفصل تماماً، لكن بيفهموه من خلال القواعد والأنماط اللي اتعودوا عليها في لغتهم الأم.
بمعنى تاني، العربي بيكون حاضر في الخلفية طول الوقت وبيأثر تلقائياً على طريقة ترتيب الجمل واختيار الكلمات والتعبير عن الأفكار، وده معناه إن لما تيجي تتكلم إنجليزي، دماغك مش هيبدأ من نقطة الصفر، هو هيبدأ من الحاجة المألوفة بالنسبة له وهي العربي، لأنها اللغة اللي استخدمها طول حياتك واللي متخزنة فيه بشكل أعمق وأسرع.
وعشان كده الترجمة لما بتكون في دماغك قبل ما تتكلم مش علامة ضعف، دي ببساطة نتيجة طبيعية لطريقة تعلم المخ للغات، ومع التدريب الصح، هتقدر تقلل الاعتماد على الترجمة وتبدأ تفكر بالإنجليزي بشكل أسرع وأسهل
2- اتعلمت القواعد قبل المحادثة
لو اتعلمت الإنجليزي في المدرسة أو في كورسات تقليدية، فغالباً هتكون اتعلمت القواعد والترجمة والحفظ ومتدربتش على إنك تسمع وترد علكول.
والنتيجة إن وقت الكلام، هتلاقي إن دماغك بيحاول يطبق القواعد اللي حفظها بالعربي، فبيمر على العربي بشكل تلقائي.
3- حفظت كلمات منفصلة مش جمل
لما بتحفظ كلمات منفصلة والترجمة بتاعتها زي مثلاً كلمة“Happy = سعيد”، دماغك بيبدأ يبني جسر بين الكلمتين، ولما تيجي تستخدمها في الكلام، هتلاقي مخك بيفتكرها بالعربي الأول وبعدين يترجمها للإنجليزي.
لكن لو اتعلمت جملة “I’m really happy today” كجملة كاملة، دماغك بيبدأ يسترجعها ويفتكرها بشكل تلقائي من غير ما يفكر في العربي.
4- مش بتسمع إنجليزي كفاية
التعرض المنتظم للإنجليزي هو اللي بيساعد دماغك يتعود عليه ويبدأ يتعامل معاه بشكل طبيعي، وكل ما تسمع إنجليزي أكتر، كل ما الجمل والتراكيب والأنماط الصوتية بتترسخ في ذاكرتك، ووقتها بتلاقي نفسك بتفهم أسرع وبتتكلم من غير ما تحتاج تترجم كلمة كلمة.
لكن لو مش بتسمع إنجليزي بشكل كفاية في يومك، دماغك ببساطة مش بيلاقي مخزون جاهز يعتمد عليه، فبيبتدي فبيعمل يرجع للحاجة الأكثر أماناً بالنسبة له وهي العربي، وده اللي بيخليك تحس إنك لازم تكوّن الجملة بالعربي الأول، وبعدين تحاول تقولها بالإنجليزي.
عشان كده الاستماع مش مجرد وسيلة لتحسين الفهم بس، هو كمان بيساعدك تبني “إحساس” باللغة، ويخليك مع الوقت تفكر بالإنجليزي بشكل تلقائي، من غير ما تمر بمرحلة الترجمة في كل مرة.
إزاي الترجمة الذهنية بتأثر على طلاقتك؟
الترجمة في دماغك قبل ما تتكلم ممكن تبان خطوة بسيطة، لكنها في الحقيقة بتأثر على طلاقتك أكتر ما تتخيل، فبدل ما دماغك يركز على توصيل الفكرة، بيكون مشغول بترتيب الجملة بالعربي الأول وبعدين تحويلها للإنجليزي، وده بيعمل ضغط إضافي يخلي الكلام أصعب وأبطأ، ودي عيوب الترجمة الذهنية:
1- بتبطأ كلامك بشكل واضح
لما بترجم في دماغك، بتعمل عمليتين بدل عملية واحدة، لأنك بتفكر بالعربي، وبعدين بتحول الفكرة لإنجليزي، والخطوة الإضافية دي بتاخد وقت، وبتظهر في كلامك على شكل تردد أو توقف في وسط الكلام أو إنك تكرر كلمة “ehh” كتير قبل ما تكمل الجملة.
2- بتخليك تفقد ثقتك في نفسك
وجود خطوة الترجمة الذهنية دي بتخليك طول الوقت تسأل نفسك “هل الجملة دي صح؟” و”هل استخدمت الكلمة المناسبة؟”، والأسئلة دي بتخليك متردد، وكل ما التردد يزيد، الثقة بتقل حتى لو مستواك كويس فعلاً في اللغة.
3- بتخليك تنسى الكلمات في أصعب وقت
لو بتتكلم في أي محادثة، هتلاقي إن دماغك بيكون بيعمل كذا حاجة مع بعض زي إنه بيسمع وبيفهم وبيفكر في الرد وبيحاول يترجم.
الضغط ده بيستهلك جزء كبير من تركيزك، وبالتالي ممكن تلاقي كلمات إنت عارفها كويس اختفت فجأة وقت الكلام بسبب الضغط وده بيزود الإحساس بالتوتر.
4- بتخلي الجملة تطلع غير طبيعية
الترجمة الحرفية من العربي للإنجليزي مش دايماً بتكون دقيقة، لأن كل لغة ليها طريقة مختلفة في التعبير وترتيب الجملة، فممكن تكون بتقول جملة صح من ناحية الكلمات، لكن شكلها غريب بالنسبة للمتحدث الأصلي، زي مثلاً ممكن تقول جملة “I opened the television”، والترجمة الحرفية ليها هتكون “فتحت التلفزيون”، لكن التعبير الطبيعي والمعنى الدقيق هو “I turned on the TV”.
وده بيوضح إن المشكلة مش في إنك مش عارف الكلمة، المشكلة إنك بتفكر بطريقة ترجمة مباشرة بدل ما تستخدم التعبير الطبيعي في اللغة.
علامات بتأكد إنك بترجم قبل ما تتكلم
لو لاحظت أي حاجة من دول أثناء كلامك بالإنجليزي، فغالباً أنت لسه بتعتمد على الترجمة الذهنية:
- بتاخد وقت طويل قبل ما ترد حتى على سؤال بسيط.
- بتلاقي نفسك بترتب الجملة في دماغك قبل ما تنطقها.
- بتكون عارف الإجابة بالعربي، لكن مش قادر تقولها بسرعة بالإنجليزي.
- بتحس إن الكلام بيطلع بمجهود مش بشكل طبيعي.
- بتتوقف في نص الجملة أو تبتسم علشان تكسر لحظة الصمت وإنت بتتكلم.
- بتستخدم جمل أقصر وأبسط من الفكرة اللي في دماغك بالعربي.
وجود العلامات دي مش معناه إن مستواك ضعيف، ده معناه بس إن دماغك لسه بيضيف خطوة الترجمة قبل الكلام، وده اللي محتاج تشتغل على تقليله بشكل تدريجي.
إزاي تبدأ تفكر بالإنجليزي بدل العربي؟
1- اتعلم جمل كاملة مش كلمات
بدل ما تحفظ كلمات منفصلة، حاول تتعلم جمل كاملة تستخدمها فعلاً في حياتك اليومية زي:
- I need to go now
- I’m not sure about this
- That makes sense
الجمل الجاهزة دي بتختصر وقت التفكير، لأن دماغك بيستدعيها مباشرة وقت الكلام من غير ما يمر بمرحلة الترجمة.
2- اسمع إنجليزي كل يوم بانتظام
الانتظام أهم من عدد الساعات، فلو سمعت كل يوم إنجليزي لمدة 20 دقيقة، هيفيدك أكتر من لو سمعته مرة واحدة في الأسبوع لمدة ساعتين.
وممكن تسمع الإنجليزي من خلال البودكاست أو الفيديوها المناسبة لمستواك، وحاول تركز على الجمل اللي بتتكرر وطريقة التعبير والكلمات اللي بتيجي مع بعض، ومع الوقت هتلاقي إن دماغك بدأ يخزن الأنماط دي ويستخدمها تلقائياً.
3- استخدم طريقة Shadowing
الـ Shadowing يعني تسمع جملة من متحدث أصلي وتكررها فوراً بنفس السرعة والإيقاع.
التمرين ده مهم لأنه بيخلي دماغك ينتج الجملة بسرعة من غير ما يكون عنده وقت يترجمها للعربي الأول، ووده بيساعدك تتعود على التفكير بالإنجليزي بشكل مباشر.
4- اتكلم مع نفسك بالإنجليزي
حاول تدريجياً تتكلم مع نفسك كل يوم بالإنجليزي بدل العربي، وابدأ بجمل بسيطة عشان تعود مخك على الكلام بالإنجليزي زي:
- I’m tired
- I need coffee
- I have work today
5- اتكلم حتى لو غلطت
الخوف من الغلط بيخلي ناس كتير تفكر كتير قبل ما تتكلم، وده بيزود الترجمة الذهنية.
والحقيقة إن الطلاقة بتيجي من الاستمرار في الكلام، مش من إن كل جملة تكون مثالية، لأن كل مرة بتتكلم بدون توقف طويل، هتدرب دماغك إنه يفكر بالإنجليزي أسرع.
6- قلّل الترجمة تدريجياً
مش واقعي إنك تبطل ترجمة فجأة، والأفضل إنك تقللها خطوة خطوة، يعني مثلاً لو عايز تقول “مبسوط”، حاول تستخدم كلمة happy مباشرة من غير ما تقولها بالعربي الأول في دماغك، ومع التكرار، هتلاقي إن دماغك بدأ يتعود على الربط المباشر بين الفكرة والكلمة الإنجليزية.
تمارين عملية تقلل الترجمة في دماغك
1- اوصف يومك بالإنجليزي
قبل ما تنام حاول تحكي لنفسك إيه اللي حصل خلال يومك وتعبر عن ده بجمل بسيطة زي:
- Today I woke up late.
- I had coffee.
- I went to work.
- I was tired.
التمرين ده هيساعدك تربط حياتك اليومية مباشرة باللغة الإنجليزية.
2- سمي الأشياء اللي حواليك بالإنجليزي
ممكن تبص حواليك وتبدأ تسمي الأشياء زي chair وphone وwindow وcar، وبعد كده انتقل للأفعال زي open وclose وeat وdrink، مع الوقت هتلاقي إن التمرين ده بيخلق رابط مباشر بين الكلمة والمعنى من غير ما تترجم للعربي.
3- كرر جمل جاهزة بصوت عالي
اختار 10 جمل بتستخدمهم كتير في حياتك، وكررهم كل يوم زي:
- Can you help me?
- I don’t understand
- Let me think
- Give me a minute
مع الوقت هتلاقي إن التكرار ده بيخلي الجمل دي جاهزة في دماغك وقت الحاجة.
4- سجّل صوتك
حاول تسجل نفسك وإنت بتتكلم عن موضوع بسيط، واسمع التسجيل ده علطول وحدد الأماكن اللي وقفت فيها أو اترددت، وغالباً هتكون دي اللحظات اللي حاولت فيها تترجم للعربي، وصحح الأخطاء دي، ومع الوقت.هتلاقي إن الوقفات دي بتقل.
5- محادثة قصيرة يومية
خصص 5 دقائق كل يوم تتكلم فيهم إنجليزي سواء مع صديق أو مدرس أو حتى مع نفسك، المهم إنك تتكلم من غير توقف طويل، والهدف من التمرين ده مش إنك تكون كامل، الهدف إنك تعود دماغك يفكر بسرعة بالإنجليزي مش العربي.
هل لازم مستواك يكون عالي عشان تفكر بالإنجليزي؟
لا خالص، وده من أهم الحاجات اللي لازم تعرفها، لأن التفكير بالإنجليزي مهارة منفصلة عن مستواك اللغوي ومش مرتبطة بعدد الكلمات اللي إنت عارفاها أو القواعد اللي اتعلمتها.
فيه ناس في مستوى A1 ممكن تكون بتبدأ تفكر بالإنجليزي بجمل بسيطة جداً، وناس في مستوى B2 ممكن تكون لسه بتترجم لأنها اتعلمت بطريقة معينة.
وعشان تقدر تفكر بالإنجليزي بشكل صح ممكن تبدأ تفكر بجمل بسيطة جداً في الأول وتبعد عن الجمل المعقدة، لأن كل ما جملك كانت بسيطة في الأول كل ما التفكير بالإنجليزي هيبقى أسهل.
يعني مثلاً ابدأ بجملة “I’m hungry” بدل ما تقول “I was contemplating whether to order food or cook”.
إمتى تحتاج كورس محادثة؟
التمارين اللي اتكلمنا عنها كلها مهمة ومفيدة، وممكن تبدأ بيها من النهاردة لوحدك، بس في حاجة واحدة التمرين الذاتي مش بيقدر يعملها، وهي إنك تتكلم تحت ضغط حقيقي مع تصحيح فوري.
لأن لما بتتكلم مع حد حقيقي، دماغك بيتدرب على إنتاج الكلام بسرعة من غير وقت للترجمة، كمان بتتعود على إيقاع الكلام الحقيقي، وهو ده التدريب الوحيد اللي بيقلل الترجمة الذهنية بشكل حقيقي وسريع.
كورس المحادثة مع مصطفى عاطف: المكان اللي بتتعلم فيه تتكلم علطول
مصطفى عاطف متخصص في تعليم الإنجليزي للكبار من مستوى A1-A2، وعنده أكتر من 60,000 متعلم استفادوا من كورساته.
وكورس المحادثة مع المستر مش بيعلمك تحفظ قواعد، هو بيعلمك تتكلم مباشرة من غير ما تفكر بالعربي الأول.
تعرّف أيضا على: أفضل كورسات انجليزي في مصر مع مستر مصطفى عاطف.
إيه اللي هيحصل معاك في الكورس؟
في 8 جلسات زووم مباشرة عشان تقدر تتكلم فعلاً مش بس تسمع شرح، وده هو التدريب اللي بيكسر عادة الترجمة الذهنية، لأن السرعة الطبيعية للمحادثة مبتسمحش لدماغك يترجم، وكل جلسة بتتعود أكتر على إنك تفكر وترد بالإنجليزي مباشرة.
غير كده، هيبقى معاك مصطفى عاطف على واتساب لمدة شهرين، يعني لو عندك موقف أو جملة مش قادر تقولها من غير ما تترجم، هتلاقي حد يساعدك تشتغل عليها.
الخاتمة
لو بتفكر بالعربي قبل ما تتكلم إنجليزي، فده مش عيب… ده نتيجة طبيعية لطريقة اتعلمت بيها اللغة، لأن أغلبنا بدأ بحفظ كلمات وترجمة جمل، فبقى من الطبيعي إن دماغنا يرجع للعربي كخطوة أولى قبل ما يتكلم.
الخبر الحلو إن أي مهارة اتعلمتها بطريقة غلط، هتقدر تعيد تدريب نفسك عليها بطريقة أفضل، ومش محتاج تستنى لحد ما مستواك يبقى متقدم، ومش مطلوب منك تبطل ترجمة فجأة، لأن التغيير الحقيقي بيبدأ بخطوات صغيرة وثابتة.
وممكن تبدأ النهاردة بجملة واحدة بس بالإنجليزي عن حياتك زي I’m having coffee now أو I’m tired today عشان تدرب دماغك إنه يفكر مباشرة بالإنجليزي من غير ما يمر على العربي الأول، ومع التكرار اليومي، هتلاقي إن الخطوة دي بقيت أسهل وأسرع.
ولو حابب تختصر وقت أطول من التجربة الفردية، وتتدرب مع شخص بيوجهك ويصححلك ويساعدك تتخلص من عادة الترجمة بشكل أسرع فكورس المحادثة مع مستر مصطفى عاطف هيبقى أفضل حل ليك.
أسئلة شائعة عن بتفكر بالعربي قبل ما تتكلم إنجليزي
أيوه طبيعي جداً في البداية، وفيه أبحاث كتيرة أكدت إن كل متعلم لغة بيعدي بمرحلة بيتنقل فيها بين اللغتين، الفرق الوحيد هو إن المتعلمين اللي اشتغلوا على المهارة دي بدأوا يفكروا بالإنجليزي بشكل مباشر مع الوقت.
الجمل الجاهزة بتساعد بشكل كبير، بس الهدف مش الحفظ… الهدف إنك تتعلم الجملة في سياق حياتي حقيقي عشان تيجيلك بشكل تلقائي، لكن الجمل المحفوظة من غير سياق ممكن متجيش لو احتاجتها في الكلام.
أيوة طبعاً، لأن كل ما هتسمع إنجليزي طبيعي أكتر، كل ما دماغك هيبني أنماط جاهزة من الكلام هيقدر يفتكرها علطول وقت الكلام من غير ما يمر على العربي.
