ناس كتير بتقرأ إنجليزي كويس وبتفهم الأفلام وبتكتب من غير مشاكل، بس أول ما حد يكلمهم بالإنجليزي الدنيا بتتغير خالص، وبيلاقوا إن الجملة مش بتطلع.
الكلمات بتكون موجودة في دماغهم بس مش بتيجي في الوقت الصح، والكلام بيطلع بطيء ومتقطع وبيحسوا إنهم بيترجموا من العربي مش بيتكلموا إنجليزي، وبعدين بيفكروا إنهم مش بيعرفوا يتكلموا إنجليزي.
بس المشكلة مش في الإنجليزي، المشكلة في إزاي اتعلموا الإنجليزي من الأول، وده اللي هنوضحه في المقال ده وهنعرف الحل العملي علشان تتكلم إنجليزي.
مشكلتك مش في اللغة.. المشكلة في طريقة التعلم
لو اتعلمت إنجليزي في المدرسة أو في كورسات تقليدية، في الغالب هتكون اتعلمته بطريقة معينة وهي إنك حفظت قواعد وحفظت كلمات واتعلمت تكتب وتذاكر امتحانات، بس ما اتدربتش على حاجة واحدة مهمة، وهي إنك تتكلم.
الأبحاث اللغوية بتثبت إن فيه فرق كبير بين معرفة اللغة واستخدام اللغة، فإنت ممكن تكون عارف قواعد النحو كلها وعارف آلاف الكلمات، وبرضه تتعب لما تيجي تبني جملة بسرعة في محادثة حقيقية، ده لأن الكلام محتاج سرعة معالجة عالية، ودماغك مدربش عليها.
ليه الكلام أصعب من القراءة والكتابة؟
- لما بتقرأ أو بتكتب بيكون عندك وقت تفكر وتراجع وتصحح، بس في الكلام كل ده بيحصل في نفس الثانية، ودماغك بيحتاج يختار الكلمة الصح عشان يبني الجملة ويراعي النطق ويستمع للرد، وكل ده مع بعضه في نفس الوقت.
- الفارق التاني إن العربي والإنجليزي مختلفين في التركيب الأساسي، لأن في العربي الجملة ممكن تبدأ بالفعل، لكن في الإنجليزي لازم الجملة تبدأ بالفاعل، وده بيأثر على الطريقة اللي دماغك بيبني بيها الجملة.
- ناس كتيرة بتفكر بالعربي وبتترجم للإنجليزي، وده بيبطأ الكلام وبيحسسك إنك بتتعب عشان تتكلم.
- كمان مختلفين في الأزمنة، لأن اللغة العربية فيها زمن ماضي ومضارع، إنما الإنجليزي ففيه 12 زمن مختلف، وكل زمن بيعبر عن فكرة مختلفة، وده بيعمل تردد في الكلام، لأنك بتحاول تختار الزمن الصح وبتتكلم في نفس الوقت.
الطلاقة مش معناها الكمال
ده مفهوم مهم جداً وناس كتير مش واخدة بالها منه، فالطلاقة في الكلام مش معناها إنك مش بتغلط لكن معناها إنك بتكمل، وبتقول الجمل حتى لو فيها غلطة صغيرة.
لأن المتحدث الأصلي نفسه بيغلط وبيصحح لنفسه وبيوقف في النص، بس الفرق إنه مش بيوقف كل شوية عشان يفكر في القاعدة، هو بيكمل لأن دماغه اتدرب على الكلام كعادة، عشان كده هدفك لازم يكون إنك تتكلم وتكمل مش إنك تتكلم من غير أي غلطة.
8 خطوات عملية تخليك تتكلم بطلاقة
1- اتكلم من أول يوم
أكبر غلطة ناس كتير بيعملوها إنهم بيفكروا ميتكلموش اللغة الإنجليزية إلا لما يوصلوا لمستوى كويس، وده مش هيحصل لأن الكلام هو اللي هيوصلك للمستوى الكويس مش العكس، عشان كده حاول تتكلم من أول يوم حتى لو هتقول جملتين بس
2- فكر بالإنجليزي مش بالعربي
لما بتفكر بالعربي وبتترجم للإنجليزي، الكلام بيتأخر وبيطلع مش طبيعي، عشان كده حاول تفكر بالإنجليزي مباشرة حتى لو بكلمات بسيطة، لأن ده بيطور مستواك مع الوقت.
3- اتعلم جمل كاملة مش كلمات
بدل ما تحفظ كلمة “Suggest” لوحدها، اتعلم جملة كاملة زي “?Can I suggest something”، لأن الجمل الجاهزة دي بتطلع تلقائي في الكلام من غير ما تحتاج تبني الجملة من الصفر كل مرة وإنت بتتكلم.
4- اشتغل على الأزمنة الأساسية الأول
في البداية إنت مش محتاج تتعلم الـ 12 زمن مرة واحدة، ممكن تتعلم زمن المضارع البسيط والماضي البسيط والمضارع المستمر لأنهم بيغطوا 80% من المحادثات اليومية، وحاول تتقن الثلاثة دول وبعد كده زود الأزمنة.
5- اتكلم بصوت عالي كل يوم
حاول تتكلم كل يوم حتى لو مع نفسك، ممكن مثلاً توصف يومك بالإنجليزي، تعلق على كل حاجة بتشوفها، تحكي قصة حصلت، لأن الكلام بصوت عالي هو اللي بيدرب دماغك على عملية بناء الجملة والنطق مع بعض، وبيخليك تكتشف الكلمات اللي مش بتجيلك بسهولة، وتبدأ تشتغل عليها وتطور مستواك فيها بسرعة.
6- استنى ثانيتين قبل ما تبدأ تتكلم
ناس كتير بتحاول تتكلم بسرعة عشان تبان fluent وبيتلخبطوا، عشان كده خلي فيه ثانيتين صمت قبل ما تبدأ، ده هيخلي قدامك وقت تجمع أفكارك وتبدأ بشكل أحسن.
7- خلي الإنجليزي جزء من يومك
الكلام بيتحسن لما بتتعرض للغة أكتر، وده من خلال إنك تشوف أفلام ومسلسلات وبودكاستات، حتى لو مش فاهم كل حاجة، لأن دماغك بيلتقط الأنماط بشكل تلقائي ويبقى أسرع في استخدامها وقت الكلام.
الغلطات اللي بتعطلك عن الطلاقة
- بتوقف عند كل غلطة: لما بتوقف وتصحح لنفسك كل شوية، الكلام بيتقطع والشخص اللي قدامك بيتشتت، عشان كده الأحسن إنك تكمل وتصحح في الجملة الجاية أو تستمر لو الغلطة مش بتأثر على المعنى.
- بتستخدم كلمات صعبة عشان تبان طليق: ناس كتير بتحاول تستخدم كلمات معقدة عشان تبان fluent، بس الكلمات البسيطة والجمل القصيرة بتخلي الكلام أوضح بكتير، والطلاقة مش في الكلمات الصعبة، هي بتكون في سهولة التعبير.
- بتستنى لحظة إنك تكون جاهز: اللحظة دي مش بتيجي لوحدها، لأن عشان تكون جاهز لازم تمارس اللغة، وهتلاقي نفسك بتتحسن أسرع مما بتتخيل.
إزاي كورس المحادثة مع مصطفى عاطف بيشتغل على الطلاقة؟
لو حاسس إن الإنجليزي بتاعك كويس، بس مش بتعرف تتكلم يبقى لازم تشترك في كورس المحادثة مع مصطفى عاطف لأن الكورس ده بيشتغل على إنك تكون طليق في اللغة من خلال الكلام الحقيقي، كمان المستر بيصحللك أي خطأ في الكلام باستمرار.
الأسئلة الشائعة
أيوة، الأبحاث بتثبت إن الكبار بيتعلموا الكلام بشكل فعال لأنهم عندهم قدرة أحسن على الفهم والتركيز، وعملية التعلم ممكن في أي سن.
القواعد مهمة بس مش الأهم في البداية، المحادثة اليومية بتعتمد على جمل وأنماط بتتكرر، ولو اتقنت الأنماط دي هتتكلم بطلاقة حتى لو لسه مش حافظ كل القواعد.
