كتير من الناس بيعرفوا إنجليزي كويس، وبيفهموا الأفلام وبيقرأوا المقالات من غير مشكلة، لكن أول ما ييجي وقت الكلام كل حاجة بتتغير، ودماغهم بتفضى والكلمات اللي كانوا عارفينها بتختفي فجأة، وبيفتكروا للأسف إن كده مستواهم في الإنجليزي مش كويس.
لكن المفاجأة إن الأبحاث بتقول إن فيه أكتر من 85% من الأشخاص اللي بيتعلموا اللغات الأجنبية بيحسوا بالخوف ده لما بيبدأوا يتكلموا، وده مش معناه إن مستواهم ضعيف في اللغة، وفي المقال ده هنعرفك ليه الناس بيخافوا يتكلموا إنجليزي وايه اللي بيحصل في دماغهم لما بيخافوا وإزاي يتغلبوا على الخوف ده.
مشكلتك مش في اللغة… المشكلة في الخوف
اللي بتحسه اسمه قلق أو خوف اللغة الأجنبية، وده مصطلح نفسي بيدرسه الباحثون من الثمانينات لحد دلوقتي، والأبحاث بتعرفه إنه كمجموعة من الاستجابات العاطفية والعمليات الإدراكية اللي المتعلم بيحسها لما بيتكلم بلغة جديدة، وبتشتغل كحاجز نفسي بيمنعه يتواصل بشكل فعال باللغة دي حتى لو كان عنده معرفة كبيرة باللغويات بتاعتها.
يعني ممكن تكون عارف الكلمات وعارف القواعد وبتفهم الكلام وبرضه مش بتقدر تتكلم، وده لأن الخوف بيعمل حاجز بين الحاجة اللي تعرفها وبين قدرتك على إنك تستخدمها.
ايه الأسباب الحقيقية اللي بتخليك تخاف؟
الأبحاث أكدت إن أسباب الخوف بتيجي من مصدرين وهما مصدر داخلي ومصدر خارجي، وأكدت إن المصادر الداخلية هي الخوف من إنك تقع في الغلط وقلة ثقتك بنفسك والإحساس إنك مش جاهز كفاية.
لكن المصادر الخارجية فهي إنك خايف الناس تحكم عليك، أو بتقارن نفسك بناس تانية أحسن منك، وممكن المشكلة تكون في البيئة اللي بتتعلم فيها نفسها.
ايه هي أنواع الخوف؟
فيه 3 أنواع مختلفة من الخوف حددهم الباحثون وهم:
- النوع الأول: وفي النوع ده إنت بتكون خايف من التواصل، عشان كده بتتجنب الكلام خالص.
- النوع التاني: وهنا انت بتكون خايف من أدائك، وبالتالي هتحس إن كل كلمة بتقولها ناس تانية بيتحكموا فيها ويقيموها.
- النوع التالت: في النوع ده إنت بتكون خايف من الحكم السلبي، وده أكتر نوع منتشر، لأن ناس كتيرة بتكون خايفة إن الناس تحكم عليها أو تضحك عليها لو غلطت.
التلت أنواع دول لو اتجمعوا مع بعض، بيخلوك تخاف وتتجنب الكلام وتتجنب الكلام عشان كده هتلاقي نفسك مش بتتحسن.
لو بتقارن نفسك بغيرك… فإنت بتعطل تقدمك
فيه أبحاث كتيرة أكدت إن من أكتر الأسباب اللي بتزود الخوف عند المتعلم هي إنه يقارن نفسه بناس تانية طليقة في اللغة، لأنهم لما بيشوفوا حد بيتكلم إنجليزي بكل سهولة وهما لسه بيتعلموا وبيتعبوا عشان يعرفوا يتكلموا دماغهم بتفسر ده كدليل على الضعف أو الفشل
بس المقارنة دي مش عادلة خالص، لأن إنت مش شايف السنين اللي الشخص ده اتمرن فيها، ومش شايف الغلطات اللي عملها وحد صححها، ومش شايف إنه في وقت كان بيحس بنفس اللي بتحس بيه دلوقتي بالظبط.
خطوات علمية تساعدك تتغلب على الخوف
1- اعترف بالخوف بدل ما تحاربه
أول خطوة مش إنك تتجاهل الخوف أو تتظاهر إنه مش موجود، لأن ده هيزوده أكتر، عشان كده حاول تعترف بيه عشان تخفف حدته، وقول لنفسك “أيوة أنا خايف وده طبيعي ومش معناه إني مش قادر”.
2- غيّر نظرتك للغلط عندك
الغلطة في اللغة مش فشل، دي بتكون دليل على إنك بتحاول، والأبحاث أكدت إن المتعلمين اللي يتقبلوا الغلط، وبيعتبروه جزء طبيعي من عملية التعلم مستواهم بيتحسن بشكل أسرع من الناس التانية اللي بتحاول تتكلم من غير ما تغلط، لأن المتحدث الأصلي نفسه بيغلط، بس الفرق الوحيد إنه ما بيوقفش.
3- اختار بيئة آمنة عشان تبدأ تتكلم
حاول متبدأش بأصعب موقف وابدأ بالكلام مع شخص يتثق فيه، أو مع نفسك قدام المرايا، أو مع أي تطبيق لأن بيئة التعليم الآمنة هتخليك تتعود على الكلام من غير ما تحس بضغط إن حد يقيمك أو يحكم عليك.
4- افهم المعنى قبل ما تفكر في الشكل
حاول لما تكون بتتكلم يكون هدفك الأساسي إنك توصل المعنى ومتركزش إن المفروض كل جملة تطلع مثالية، لأن الشخص اللي قدامك لو فهم قصدك هتكون نجحت في الكلام.
5- خد نفس عميق قبل ما تتكلم
ده مش كلام فاضي، لأن الأبحاث النفسية بتثبت إن التنفس البطيء العميق بيخفف من استجابة الجهاز العصبي للخوف في ثواني، عشان كده قبل ما تبدأ تتكلم في موقف صعب، حاول تاخد نفس عميق واحد لأنه هيفرق كتير معاك.
6- اتعلم جمل جاهزة للمواقف الصعبة
من أكتر الحاجات اللي ممكن تكون بتضغطك في الكلام، إنك تتعرض لموقف وما تعرفش تعبر عن حاجة، عشان كده لازم تكون حافظ جمل جاهزة زي “That’s a good question, let me think” أو “I’m not sure how to say this but” لأن الجمل دي هتديك وقت تفكر وبتخلي الكلام يستمر من غير ما توقف.
7- خلي اللغة جزء من يومك
كل ما بتسمع وبتشوف إنجليزي أكتر، كل ما دماغك بيتعود على الأنماط وبيبقى أسرع في استرجاعها وإنت بتتكلم، عشان كده خلي اللغة جزء أساسي من يومك واتفرج على المسلسلات والبودكاستات والأفلام عشان تعمل تدريب نشط للدماغ.
8- خلي الكلام عادة يومية
لو اتكلمت كل يوم 10 دقايق إنجليزي هيبقى أحسن بكتير من تتكلم ساعتين مرة واحدة في الأسبوع، لأن الانتظام هو اللي هيخليك تثق في نفسك.
إزاي تميز بين الخوف اللي بيساعدك والخوف اللي بيوقفك
مش كل خوف أو قلق بيكون مضر، لأن فيه قلق بيخليك تستعد أحسن وتركز أكتر، وتهتم بتفاصيل اللغة كويس وده بيكون قلق مساعد، لكن في قلق تاني بيمنعك عن الكلام وبيخليك تتجنب إنك تتعرض لأي موقف فيه إنجليزي، والنوع ده من القلق بيعطلك مش بيساعدك.
عشان كده لو إنت حاسس إن خوفك بيعطلك وبيأثر على قراراتك وحياتك اليومية، يبقى إنت محتاج تشتغل عليه بشكل كبير مع متخصص.
إزاي كورس المحادثة مع مصطفى عاطف بيشتغل على الخوف ده؟
لو حاسس إن الخوف بيوقفك عن الكلام بالإنجليزي، يبقى كورس المحادثة مع مستر مصطفى عاطف هو الحل للمشكلة دي، لأن مستر مصطفى عاطف مش بيعلمك القواعد بس هو بيشتغل كمان على إنك تتكلم في بيئة آمنة مع تصحيح فوري من غير ما حد يحكم عليك.
كمان بيوفر جلسات زووم بتتعلم فيها تتكلم مش تحفظ، وفيه متابعة على واتساب لفترة محددة عشان تفضل تتدرب بانتظام، كمان بيساعدك إنك تبني ثقتك في نفسك عشان تقدر تتكلم.
الخلاصة
الخوف من الكلام بالإنجليزي مش علامة ضعف.. هو استجابة طبيعية بتحصل لأكتر من 85% من متعلمي اللغات، والفرق بين اللي اتغلب عليه واللي لسه واقف هو القرار إنه يبدأ يتكلم حتى وهو خايف، لأن الثقة مش بتيجي قبل الكلام، دي بتيجي من الكلام نفسه.
الأسئلة الشائعة
أيوة وبشكل كبير، لأن الأبحاث أكدت إن الطلاب اللي بيجيبوا درجات عالية في الامتحانات التحريرية بيحسوا بنفس الخوف ده وقت الكلام، وده معناه إن الخوف مش علامة على ضعف المستوى، هو بس استجابة نفسية مستقلة عن المعرفة.
أحياناً أيوة لو بتتكلم بانتظام في بيئة مريحة، بس فيه ناس كتيرة الخوف بيفضل زي ما هو أو بيزيد لو مشتغلوش عليه بشكل واعي.
أيوة، لأن الثقة مش مرتبطة بالمستوى، وفيه ناس في مستوى A1 وبيتكلموا بثقة لأنهم اتعلموا يقبلوا الغلط ويكملوا، وناس تانية في مستوى B2 بيتجمدوا لأن الخوف أكبر من معرفتهم.
أيوة، لأن الكلام مع نفسك بيدرب دماغك على عملية بناء الجملة والنطق من غير ضغط الحكم، وده وبيخليك تكتشف الكلمات اللي مش بتيجيلك بسهولة وتشتغل عليها قبل ما تتكلم مع حد تاني.
