خليني أسألك سؤال بسيط كده… لو حد سألك دلوقتي: مستواك إيه في الإنجليزي؟ هترد تقول إيه؟
مبتدئ؟ متوسط؟ ولا ممكن تقول “أنا بعرف شوية” وخلاص؟
الحقيقة إن السؤال ده بيحير ناس كتير جدًا، خصوصًا لما تبدأ تدور على كورسات أو كتب وتلاقي مكتوب عليها A1 — A2 — B1 — B2 — C1، وتفضل تسأل نفسك يعني إيه الحروف دي؟ وأختار أنهي مستوى فيهم؟
المشكلة هنا إن أغلب الناس بتبدأ تتعلم إنجليزي بشكل عشوائي من غير ما تكون فاهمة هي واقفة فين أصلاً، وده بيخليهم:
ياخدوا كورس أعلى من مستواهم → فيحسوا إن الإنجليزي صعب.
أو ياخدوا كورس أقل من مستواهم → فيحسوا بملل وميكونش فيه تطور.
وفي الحالتين النتيجة بتكون واحدة وهي الإحباط والتوقف، وعشان كده المقال ده معمول مخصوص ليك، لأنك هتفهم فيه يعني إيه مستويات اللغة الإنجليزية ومستويات اللغة الإنجليزية بالترتيب من A1 لحد C2 والفرق بين كل مستوى والتاني وإزاي تحدد مستواك الحقيقي بسهولة وتختار الكورس أو الكتاب المناسب ليك من غير ما تضيع وقتك.
يعني إيه مستويات اللغة الإنجليزية؟ وليه مهمة أصلاً؟
عشان تعلم اللغات يبقى منظم ومفهوم، كان لازم يبقى فيه نظام عالمي نقيس بيه مستوى أي حد، لأن مش كل واحد يقول “أنا كويس” وخلاص يبقى مستواه عالي في اللغة.
ومن هنا ظهر نظام اسمه: CEFR، وده اختصار لـ: Common European Framework of Reference for Languages
طب إيه ترجمته ببساطة؟
معناه الإطار الأوروبي المرجعي المشترك للغات، والنظام ده معمول عشان يحدد مستواك في اللغة بناءً على:
- قدرتك على الفهم (Listening & Reading).
- قدرتك على الكلام (Speaking).
- قدرتك على الكتابة (Writing).
يعني مش مجرد حفظ كلمات بس… ده بيقيس كمان هل تقدر تستخدم اللغة فعلاً ولا لا، والأهم إن النظام ده معترف بيه عالميًا، وده معناه إن:
- أي كورس هتلاقيه ماشي عليه.
- أي امتحان دولي زي IELTS أو TOEFL بيعتمد عليه.
- أي شركة أو جهة بره هتفهم مستواك منه.
عشان كده لو إنت عرفت مستواك حسب CEFR، هتبقى عرفت مكانك الحقيقي في اللغة.
مستويات اللغة الإنجليزية بالترتيب من البداية للاحتراف
المستويات بتبدأ من الصفر لحد الاحتراف الكامل بالشكل ده:
- A1 — مبتدئ جدًا (Beginner).
- A2 — مبتدئ (Elementary).
- B1 — متوسط (Intermediate).
- B2 — فوق المتوسط (Upper-Intermediate).
- C1 — متقدم (Advanced).
- C2 — إتقان شبه كامل (Proficient).
خلي بالك إن كل مستوى فيهم بيعبر عن مرحلة كاملة في رحلتك مع اللغة، وكل مرحلة ليها:
- طريقة تفكير مختلفة.
- مستوى فهم مختلف.
- قدرة مختلفة على التعبير.
يعني إيه أصلًا الحرف والرقم في A1 أو B2؟
السؤال ده منطقي جدًا، وناس كتيرة بتقف عنده، وإجابته ببساطة هي إن الحرف بيقولك “إنت في أنهي مرحلة”، يعني مثلاً:
- حرف A: معناها إنك لسه في البداية خالص، وبتتعلم الأساسيات.
- حرف B: معناه إنك بقيت فاهم كويس وبتقدر تعتمد على نفسك في اللغة بشكل معقول.
- حرف C: معناه إنك وصلت لمستوى متقدم جدًا، وقريب جدًا من الشخص اللي الإنجليزي لغته الأساسية.
إنما الرقم (1 أو 2) فده بيقولك “قد إيه أنت قوي جوه نفس المرحلة” يعني رقم:
- 1: معناه إنك في بداية المرحلة ولسه بتثبت نفسك فيها.
- 2: معناه إنك بقيت أقوى شوية ومتقدم داخل نفس المستوى.
يعني ببساطة مستوى A1 أضعف من A2 وB1 أضعف من B2 ونفس الفكرة في كل المراحل.
كل مستوى بيحكي عنك إيه بالظبط؟
دلوقتي هنوضحلك الحاجات اللي تقدر تقولها في كل مستوى بالظبط:
🔹 A1 — المبتدئ جدًا
في المستوى ده إنت بتكون لسه في أول الطريق، وهتقدر:
- تقول حاجات بسيطة جدًا عن نفسك زي اسمك وعمرك ومن فين.
- تستخدم جمل قصيرة جدًا ومحدودة زي: “My name is…” و“I am from…”
- تفهم أسئلة سهلة جدًا زي “What is this?”
لكن لو سمعت حد بيتكلم الإنجليزي بالسرعة الطبيعية، مش هقدر تفهم كل الكلام بالظبط.
🔹 A2 — المبتدئ
في المستوى ده، إنت بتبدأ تفهم الحياة اليومية شوية، يعني هتقدر:
- تتكلم عن مواضيع بسيطة زي: العيلة، الأكل، الشغل، التسوق.
- تدخل في محادثات قصيرة وسهلة.
- ولو سافرت بلد إنجليزي، هتقدر تتعامل في مواقف بسيطة سواء في فندق أو مطعم أو تجاوب على سؤال بسيط في الشارع.
🔹 B1 — المتوسط
هنا بقى إنت هتلاحظ نقلة واضحة وقوية، لأنك:
- هتقدر تفهم الكلام العام عن الشغل والسفر والترفيه.
- هتقدر تتكلم عن أهدافك وأفكارك بشكل مفهوم.
- وكمان هتقدر تكتب كلام بسيط عن مواضيع تعرفها.
🔹 B2 — فوق المتوسط
ده المستوى اللي بيبدأ يبان فيه الإنجليزي فعليًا في حياتك، لأنك هتقدر:
- تفهم أفلام وبودكاست بدون ترجمة بسهولة كبيرة.
- تتكلم مع ناس أجانب بثقة.
- تعبر عن رأيك في مواضيع مختلفة.
- وفي الشغل، ده المستوى اللي شركات كتير بتطلبه.
- وفي الاختبارات زي IELTS، بيكون تقريبًا من 5.5 لـ 6.5.
🔹 C1 — المتقدم
هنا الإنجليزي بقى أداة عندك مش مجرد لغة بتتعلمها، لأنك هتقدر:
- تفهم نصوص طويلة وصعبة.
- وتتكلم بطلاقة ومن غير ما توقف كتير تدور على الكلمات.
- وتستخدم اللغة في الشغل والدراسة بشكل احترافي جدًا.
وغالبًا ده المستوى المطلوب في جامعات برا.
🔹 C2 — الاحتراف الكامل
ده أعلى مستوى ممكن في اللغة، معناه إنك:
- بتفهم كل حاجة تقريبًا بسهولة.
- وتتكلم وتكتب وكأن اللغة دي لغتك الأساسية.
- حتى المواضيع الصعبة جدًا أو الأكاديمية، بتقدر تتعامل معاها بسهولة.
مستواك في الإنجليزي يساوي كام في IELTS وTOEFL؟
كتير من المتعلمين بيسألوا نفسهم: “لو أنا مثلًا في B2… طب ده يطلع كام في IELTS؟”
أو: “أجيب كام في TOEFL عشان أكون C1؟”
الحقيقة إن مفيش رقم ثابت 100%، بس فيه تحويلات تقريبية بتديك فكرة واضحة جدًا عن مكانك أو مستواك، يعني تقدر تعتبر إن مستويات CEFR (زي A1 وB2) دي بتوصف مستواك بشكل عام، إنما امتحانات زي IELTS وTOEFL وTOEIC فبتديك رقم يثبت المستوى ده فعلاً، وعشان الموضوع يكون أوضح، الجدول الجاي هيوريك العلاقة بينهم بشكل بسيط وسهل:
| مستوى CEFR | الوصف | درجة IELTS | درجة TOEFL iBT | درجة TOEIC |
|---|---|---|---|---|
| A1 | مبتدئ جدًا | أقل من 3.0 | أقل من 30 | أقل من 225 |
| A2 | مبتدئ | 3.0 – 4.0 | 30 – 40 | 225 – 550 |
| B1 | متوسط | 4.0 – 5.0 | 42 – 71 | 550 – 780 |
| B2 | فوق المتوسط | 5.5 – 6.5 | 72 – 94 | 785 – 940 |
| C1 | متقدم | 7.0 – 8.0 | 95 – 120 | 945 – 990 |
| C2 | احتراف | 8.5 – 9.0 | 110 – 120 | 950 – 990 |
ليه مهم جدًا تعرف مستواك الحالي؟
لو إنت مش عارف مستواك في الإنجليزي، غالبًا هتضيع وقت ومجهود على الفاضي، لأنك ببساطة ممكن تبدأ في كورس أعلى من مستواك أو في كورس أقل من مستواك، وده هيسببلك إحباط كبير.
طب إيه اللي بيحصل لما تبقى عارف مستواك فعلًا؟
- هتختار صح: يعني هتجيب كورس أو كتاب مناسب ليك بالظبط، وده بيخلي التعلم أسهل وأسرع بكتير.
- هتحدد هدفك بوضوح: يعني لو ناوي تمتحن IELTS مثلًا، هتعرف تبدأ منين وعايز توصل لفين وهتحتاج وقت قد إيه.
- هتقيس تقدمك: لأن كل فترة (مثلًا كل 3 لـ 6 شهور) هتقدر ترجع تبص على نفسك وتشوف هل إنت اتحسنت فعلًا ولا لأ؟
- هتعرف نقاط ضعفك الحقيقية: لأن الإنجليزي مش حاجة واحدة، ده 4 مهارات وهم الاستماع والكلام والقراءة والكتابة، وممكن تلاقي نفسك كويس في القراءة، بس ضعيف في الكلام مثلًا، وساعتها هتعرف تركز مجهودك في المكان الصح بدل ما تضيع وقتك بشكل عشوائي.
ولأن معرفة مستواك مش خطوة اختيارية… دي أساس كل حاجة بعد كده، مستر مصطفى عاطف عملك اختبار يساعدك تحدد مستواك في اللغة بكل سهولة.
استكشف دلوقتي: كل المنتجات التعليمية اللي بيوفرها مستر مصطفى عاطف وطور مستواك في الانجليزي.
إزاي تعرف مستواك في الإنجليزي؟
🔹 الطريقة الأولى: اختبار تحديد المستوى
ده أسهل وأسرع حل عشان تحدد مستواك في اللغة، فيه اختبارات كتير موجودة على الإنترنت، بس الفكرة إنك تختار اختبار يكون موثوق ويقيس مستواك بشكل حقيقي زي اختبار مستر مصطفى عاطف.
وبمجرد ما تخلص الاختبار، هيديك مستوى تقريبي (A1 – B2 مثلًا)، وساعتها هتقدر تبدأ على أساس واضح بدل التخمين، وده هيوفر عليك وقت ومجهود وفلوس، لأنك مش هتجرب كورسات عشوائي.
🔹 الطريقة التانية: تقييم نفسك بنفسك
لو مش حابب تبدأ باختبار تحديد المستوى، فممكن ترجع للوصف بتاع كل مستوى اللي فات، وتشوف نفسك أقرب لأنهي مستوى، وبعدين اسأل نفسك شوية أسئلة زي هل بفهم كلام عادي بسهولة؟ وهل بعرف أتكلم بطلاقة ولا بتوقف كتير؟ وهل بعرف أكتب بشكل مفهوم؟
وحاول تقيم نفسك في الأربع مهارات:
- الاستماع
- الكلام
- القراءة
- الكتابة
خطة واضحة تنقلك من مستوى لمستوى
1- من A1 لـ A2 — بناء الأساس
دي أهم مرحلة في الرحلة كلها، لأنك هنا بتبني “القاعدة” اللي كل حاجة بعد كده هتكون مترتبة عليها، ولو الأساس ضعيف، هتفضل تتعب في كل المستويات اللي بعد كده.
في المرحلة دي محتاج تركز على إيه؟
✔️ الكلمات الأساسية اليومية، ولازم تحفظها وتتعلم الكلمة في جملة وفي موقف وفي سياق حقيقي.
✔️ القواعد البسيطة جدًا زي: تكوين الجملة (Subject + Verb + Object) والفرق بين الجملة الاسمية والفعلية والأسئلة البسيطة (What – Where – Do you…?)
✔️ الاستماع البطيء، وحاول تسمع حاجات بسيطة وبسرعة بطيئة عشان ودنك تتعود على اللغة من الأول.
✔️ محادثات قصيرة جدًا حتى لو جملتين بس في اليوم… المهم تبدأ.
✔️ تطبيق يومي على اللغة حتى لو 20 دقيقة في اليوم، المهم الاستمرارية مش الوقت.
إيه الأدوات المناسبة في المرحلة دي؟
كتاب English Basics A1/A2
ده يعتبر أفضل نقطة بداية لو بتبدأ من الصفر، لأن الكتاب ماشي معاك خطوة خطوة من أول الجملة البسيطة لحد ما تقدر تتكلم وتفهم بشكل مقبول في مواقف يومية.
الميزة الكبيرة فيه إنه مكتوب بأسلوب سهل وبالعامية، فمش هتحس إنك بتذاكر مادة تقيلة.
كتاب تأسيس الجرامر
لو حاسس إن مشكلتك الأساسية في القواعد، فالكتاب ده هيظبط لك الدنيا جدًا، لأنه بيشرح الجرامر بشكل بسيط ومنظم من غير تعقيد، ومش بس للمستوى ده، لأنه هيكمل معاك لحد مستويات أعلى.
كتاب فوكابي (Vocabulary)
من أكتر المشاكل اللي ببعاني منها المبتدئين إنهم بيكونوا عارفين القاعدة بس مش لاقيين كلمات، عشان كده مستر مصطفى عاطف وفرلك كتاب فوكابي.
الكتاب بيحل المشكلة دي لأنه بيركز على أهم 3000 كلمة مستخدمة في الحياة اليومية، وبيعلمك الكلمة في سياق يخليك تفتكرها وتستخدمها.
كورس تأسيس الإنجليزي A1/A2
لو الكتب لوحدها مش كفاية ليك، وعايز شرح + متابعة، فالكورس ده هيبقى مناسب جدًا ليك، لأنه بيمشي معاك من الصفر لحد مستوى تقدر تعتمد فيه على نفسك، بأسلوب تفاعلي وخطوات واضحة.
كورس الجرامر من الصفر
الكورس ده مناسب لو حاسس إن القواعد عندك مش مفهومة، لأنه بيرتبلك الجرامر من البداية بشكل تدريجي ومنطقي عشان تفهم مش تحفظ.
كورس الصوتيات والنطق
الكورس ده أهم حاجة، لأنك لو اتعودت على نطق غلط، هتتعب جدًا عشان تعدله بعد كده، والكورس ده بيعلمك:
- نطق الحروف صح.
- الفرق بين الأصوات.
- اللكنة الأمريكية بشكل مبسط.
2- من A2 لـ B1 — بناء الاستقلالية
في المرحلة دي بتحصللك نقلة مهمة جدًا، لأنك بتبدأ تحس إنك مش بس “بتفهم شوية”… إنت كمان بتعرف تتعامل باللغة، يعني هتقدر تتعامل بالإنجليزي في مواقف كتير من غير مساعدة.
طيب إيه اللي محتاج تركز عليه هنا؟
1- الأزمنة (Tenses)
هنا بقى لازم تبدأ تفهم الأزمنة بشكل أعمق شوية، مش بس شكلها وتركز على:
- الماضي (Past)
- المضارع التام (Present Perfect)
- المستقبل (Future)
المهم مش إنك تحفظ القاعدة… المهم تعرف تستخدمها في جملة حقيقية، يعني تعرف تقول أنا اشتغلت قبل كده أو أنا خلصت المهمة أو أنا هعمل كذا بكرة.
2- الاستماع بسرعة طبيعية
في مستوى A1 و A2 كنت بتسمع ببطء، لكن هنا لازم تبدأ تسمع كلام أقرب للواقع حتى لو مش فاهم كل كلمة، المهم إن ودنك تتعود.
3- المحادثة (أهم نقطة فعلًا)
هنا بقى لازم تبدأ تتكلم أكتر، ومش لازم تبقى perfect… لكن لازم:
- تعبر عن نفسك
- تغلط وتتعلم
- تحاول تكمل الجملة حتى لو مش متأكد
وخلي بالك إن دي المرحلة اللي بتكسر فيها رهبة الكلام بالإنجليزي.
4- القراءة بشكل أوسع
حاول تبدأ تقرأ مقالات بسيطة وقصص قصيرة وبوستات أطول شوية، لأن ده هيساعدك:
- تزود كلماتك
- وتفهم تركيب الجمل بشكل طبيعي
طيب تستخدم إيه عشان تطور في المرحلة دي؟
1- كورس المحادثة الإنجليزية Level 1
ده أهم خطوة في المرحلة دي بدون مبالغة، لأن أغلب الناس بتكون فاهمة الإنجليزي.كويس بس مش بتعرف تتكلم، والكورس ده هيساعدك:
- تكسر الخوف من الكلام.
- تتكلم تدريجي من السهل للصعب.
- تاخد تصحيح على أخطائك.
- تبني ثقة في نفسك وانت بتتكلم.
ومع الوقت هتلاقي نفسك: بتتكلم أسرع + بتفكر أقل + واثق أكتر
3- من B1 لـ B2 — الطلاقة والثقة
في المرحلة دي، إنت بتكون خلاص قادر تتكلم وتفهم الإنجليزي بشكل مريح، بس لسه محتاج تطور نفسك عشان توصل لمرحلة الطلاقة الحقيقية، وتبقى قادر تعمل الحاجات دي:
- تفهم بسهولة من غير مجهود كبير.
- تتكلم من غير ما توقف كل شوية.
- معندكش خوف من إنك تدخل في نقاش أو تعبر عن رأيك.
طب إنت محتاج تركز على إيه في المرحلة دي؟
- استماع كتير جدًا: لازم تسمع أفلام ومسلسلات وبودكاست وفيديوهات يوتيوب، بس المهم إن المحتوى يكون طبيعي، مش متبسط زي المراحل اللي قبل كده عشان تتعود على اللغة.
- قراءة متنوعة: حاول متقفش عند نوع واحد من المحتوى واقرأ مقالات ومواضيع مختلفة ومحتوى في مجالك، لأن ده بيوسع مفرداتك وطريقة تفكيرك بالإنجليزي.
- كتابة فعلية: ناس كتير بتتجاهل النقطة دي مع إنها مهمة جداً، والمفروض تتعود إنك تكتب فقرات ويوميات ورأيك في موضوع، لأن الكتابة بتساعدك ترتب أفكارك وتستخدم الكلمات والقواعد بشكل عملي.
- محادثة حقيقية (مش حفظ جمل): ولازم تتعلم تتكلم بشكل طبيعي ومتقولش جمل محفوظة، لكن حاول تعبر عن رأيك وتتناقش وترد وتفتح مواضيع حتى لو بتغلط.
خلي بالك إن الفرق بين B1 و B2 مش في إنك فاهم اللغة أكتر… الفرق في إنك مرتاح أكتر وإنت بتستخدم اللغة، ولو ركزت على الاستماع + المحادثة + التعرض اليومي،.هتقدر توصل للطلاقة أسرع بكتير مما تتخيل.
4- من B2 لـ C1 و C2 — الاحتراف
في المرحلة دي إنت بتتعلم تستخدم اللغة باحتراف زي أي أداة في الشغل أو الدراسة أو الحياة اليومية، يعني الإنجليزي هنا مش هدف… ده وسيلة.
طيب إيه اللي بيختلف في المرحلة دي؟
1- محتوى متخصص وأكاديمي
في المرحلة دي لازم تبدأ تتعامل مع لغة عامة ولغة متخصصة في مجالك، يعني لو شغال في:
- التسويق → تقرأ عن Marketing strategies.
- الـ SEO → تفهم مقالات وتقارير متقدمة.
- أي مجال تاني → تتابع مصادر إنجليزية أصلية فيه.
المهم إنك تبقى بتتعلم من مصادر حقيقية مش من محتوى مبسط.
2- كتابة متقدمة ومناقشات عميقة
هنا بقى الكتابة مش مجرد جمل بسيطة، لأنك لازم تتعلم:
- تكتب مقالات أو تقارير منظمة.
- تعبر عن رأيك بشكل واضح ومنطقي.
- تناقش أفكار معقدة مش مجرد مواضيع يومية.
يعني تفكيرك نفسه يبدأ يبقى بالإنجليزي بشكل أعمق.
3- استماع سريع وطبيعي بدون ترجمة
في المرحلة دي لازم تتعود إنك تسمع:
- بودكاست بسرعة طبيعية.
- محادثات بين native speakers.
- محتوى بدون تبسيط أو تهدئة للكلام.
في الأول ممكن تحس إنك بتفوت كلمات أو مش قادر تفهمها، لكن مع الوقت دماغك هيبدأ يلقط المعنى من السياق مش كلمة كلمة.
4- استخدام الإنجليزي في حياتك اليومية
حاول تخلي الإنجليزي مش مادة بتذاكرها، وخليه جزء من يومك يعني تقرأ بيه وتتابع مجالك بيه وتفكر بيه أحيانًا وتكتب بيه بشكل مستمر.
طيب توصل للمرحلة دي إزاي؟
في الحقيقة، الوصول من B2 لـ C1 و C2 مش محتاج كورس واحد وخلاص… ده محتاج استمرار + تعرض يومي + تدريب على استخدام اللغة في الواقع، لكن أهم حاجة إنك:
- تبعد عن الترجمة.
- وتبدأ تعتمد على الإنجليزي نفسه.
- وتستخدمه في مجالك بشكل مباشر.
الكورسات والكتب المخصصة للأطفال
لو إنت أب أو أم وبتفكر تبدأ رحلة تعلم الإنجليزي مع ابنك من بدري، فده قرار صح جدًا، لأن تعلم اللغة في السن الصغير بيكون أسهل وأسرع بكتير من أي وقت تاني.
وفي المرحلة دي الطفل مش محتاج شرح تقيل أو قواعد معقدة… هو محتاج طريقة ممتعة + تكرار + تفاعل تخليه يحب اللغة من الأول.
عشان كده مستر مصطفى عاطف عامل كورسات مخصصة للأطفال في الفئة العمرية دي وألعاب تعليمية، ومصممة بطريقة تناسب طريقة تفكير واستيعاب الطفل، والكورسات دي بتركز على:
- النطق الصحيح من البداية.
- تأسيس الجرامر بشكل بسيط جدًا.
- تنمية المفردات الأساسية.
- التدريب على المحادثة بطريقة تفاعلية.
والهدف الأساسي منها إن طفلك يبدأ يتكلم بثقة ويكون جمل بسيطة صح ويكسر حاجز الخوف من اللغة من بدري.
نصايح عملية تساعدك تتقدم أسرع في أي مستوى
فيه ناس بتقعد تتعلم سنين ومبتتقدمش بسرعة، وفيه ناس بتتقدم في شهور قليلة، والفرق بينهم مش إن حد ذكي وحد غبي… الفرق في طريقة المذاكرة نفسها.
ودلوقتي هنقدملك شويه نصايح لازم تمشي عليها عشان تتقدم بسرعة في اللغة:
- الالتزام أهم من المذاكرة الكتير: مينفعش تذاكر 5 ساعات في يوم واحد وبعدين توقف أسبوع، لأن اللغة محتاجة تكرار + تعود + استمرارية، عشان كده الأفضل تذاكر مدة قليلة كل يوم بس بانتظام.
- اشتغل على الأربع مهارات مع بعض: متقعش في فخ إنك تركز على حاجة وتسيب الباقي، ولازم تركز على الاستماع والكلام والقراءة والكتابة، لأن كل مهارة بتقوي التانية.
- متستعجلش في الانتقال بين المستويات: وخد وقتك في فهم كل مستوى، لأن التأسيس الصح بيوفر عليك شهور قدام.
- خلي الإنجليزي جزء من يومك: وحاول تتعرض للغة طول الوقت بإنك مثلاً تغيّر لغة الموبايل وتتفرج على فيديوهات إنجليزي وتقرأ أي حاجة بسيطة وتسمع حتى وإنت ماشي.
- اتعلم في سياق مش حفظ: ودي من أهم النصايح، لأن الكلمة لوحدها مش بتثبت في دماغك، لكن لو شفتها في جملة حقيقية، هتثبت بشكل تلقائي.
الخلاصة
تعلم اللغة مش سباق… ده طريق واضح لو مشيت فيه صح، أكبر غلطة ناس كتير بتعملها إنها بتبدأ من غير ما تعرف مستواها، وبتضيع وقتها في محتوى مش مناسب، عشان كده قبل ما تقرر تتعلم لغة لازم تعمل الحاجات دي:
✔️ اعرف مستواك الحقيقي
✔️ اختار محتوى مناسب ليك
✔️ التزم وامشي خطوة خطوة
وأهم خطوة تبدأ بيها دلوقتي هي إنك تعمل اختبار تحديد المستوى من مستر مصطفى عاطف وبعدها تقدر تختار الكتاب أو الكورس المناسب ليك وتمشي في الطريق الصح من A1 لحد الاحتراف.
أسئلة شائعة عن مستويات اللغة الإنجليزية
أسهل حل إنك تعمل اختبار تحديد مستوى الموجود على موقع مستر مصطفى عاطف، لأنه بيحدد مستواك ويوجهك تبدأ منين بالظبط.
بصراحة لا، لأنك هتحس إن الموضوع تقيل وصعب عليك جدًا وهتزهق.
ده بيختلف من شخص للتاني، بس بشكل عام، لو بتذاكر 3–4 أيام في الأسبوع، هتحتاج حوالي 18 لـ 30 شهر.
أيوة طبعًا ينفع جدًا، بس بشرط يكون عندك خطة وومحتوى مناسب لمستواك ووالتزام يومي
ده بيختلف على حسب المجال، لكن لو شغل عادي لازم يكون مستواك B1 – B2، لكن لو شغل احترافي أو في شركات كبيرة فلازم مستواك يكون C1.
